Թե ինչպես Ջիմը գողացավ «Սեզար» մրցանակաբաշխությունը
Իր կյանքը կինոյից հետո նկարչությանը նվիրած մեծ կատակերգու Ջիմ Քերրին (The Truman Show, Ace Ventura: Pet Detective, The Mask) վերջին տարիներին ոչ միայն ֆիլմերում, այլև հանրության աչքին հաճախ չի երևում: Բայց երբ որոշում է երևալ, ապա որպես կանոն՝ հանրությունը նրա հայտնությունից «խելքը թռցնում» է:
Փարիզի «Օլիմպիա » սրահում օրերս կայացած 51-րդ «Սեզար» մրցանակաբաշխությունը բացառություն չէր. ավելին, եթե Քերրին իր հայտնությունների Top 10-ը կազմի, ապա սեզարյանն անվիճելիորեն առաջին հորիզոնականում կլինի:
–Ո՞նց էր իմ ֆրանսերենը… համարյա՝ միջակ, չէ՞,- հյուսիս-ամերիկյան համուհոտով առոգանությամբ հարցնում է Ջիմն ու
Ֆրանսիական բոմոնդը խելքամաղ է լինում, աշխարհն էլ՝ հետը…
Ջիմ Քերրին պատվո «Սեզարն» ընդունելու իր ելույթն ամբողջությամբ ՝ և առանց կարդալու, արտաբերեց ֆրանսերեն, իսկ հարցազրույցի ժամանակ լրագրողներին խոստովանեց, որ ամիսներ շարունակ պատրաստել է իր ճառն ու ֆրանսերեն ուսումնասիրել: Լրագրողի հարցին, թե ո՞րն է իր սիրած ամենազվարճալի դեմքը, Ջիմը պատասխանել է. «Այն դեմքը, որ հենց հիմա ունեմ:»
Հենց այդ դեմքն էր այս անգամ աշխարհը խառնել իրար. արդյոք նա՞ է, գուցե քլո՞ն է, գուցե հոլոգրա՞մ. արհեստական բանականությամբ զտիչ-ֆի՞լտր են կիրառել, դիմա՞կ է, թե՞ պլաստիկ վիրաբույժին պետք է «Օսկար» տալ (ի դեպ, Ջիմ Քերրին , որ կինոյի ողջ պատմության՝ ամենաեկամտաբեր 50 դերասանների ցանկում է, անգամ «Օսկարի» նոմինացիա չունի): Ու մինչ Ջիմ Քերրին մրցանակն ընդունելու իր ելույթում հիշում էր Սեն- Մալոյից Կանադա գաղթած իր հեռավոր նախնի՝ Մարկ- Ֆրանսուա Քաղեին ու նշում, որ այս մրցանակով նախնիների ու իր միջև շղթան ագուցվում է, համացանցում ցունամի էր, որի ալիքը փոքր-ինչ մեղմվեց մրցանակաբաշխության պատասխանատու Գրեգորի Կոլիեի և Քերրիի խոսնակի պաշտոնական հավասիացումներից հետո միայն:
Ինչևէ , «Ջիմ Օլմայթին» Բարձրյալից ստացած ամենակարողության շնորհով ՝ փաստացի հաջողել էր իր կյանքի բեռի տարիներից թոթափել առնվազն 20-ը:
Մի առիթով հռչակավոր կատակերգուն ասել էր, թե բախտավոր է, որ իրեն Ջիմ Քերրիի դերն է բաժին հասել: «Սեզար» մրցանակաբաշխությունում Ջիմն անզուգական էր 64-ամյա Ջիմ Քերրիի «դերում»:
Կինոաշխարհ, 2026