Ֆրանսիայում, ինչպես նաև այս  օրերին բազմաթիվ այլ երկրներում, մշակութային կյանքը վերցրել է պարտադրված արձակուրդ։ Թանգարան կամ կինոթատրոն գնալը դարձել է փարիզեցիների ամենամեծ երազանքը։ Ավելին, օրեր առաջ, Ֆրանսիայի իշխանությունները հայտարարեցին, որ երկրում պարետային ժամը դառնում է 18:00-ից սկսած:

Այսպիսով, մեզ մնում է կամ երեխաների հետ միաժամանակ գնալ քնելու, կամ միացնել հեռուստացույցը, որոշ դեպքերում՝ համակարգիչը, և դիտել հետաքրքիր ծրագրեր, կամ ավելի լավ է՝ ֆիլմեր։ Այս հարցում, փրկության է գալիս Լուվրի թանգարանն իր արվեստառատ առաջարկով։ Աշխարհի ամենաշատ այցելու ունեցող թանգարանն իհարկե ֆիզիկապես փակ է, սակայն աշխատանքային թիմը գտել է արվեստի ճառագայթման նոր տարբերակ։ Լուվրում ամեն տարվա հունվար-փետրվար ամիսներին անց են կացվում «Արվեստի կինոյին նվիրված միջազգային օրերը» (JIFA-Journées internationales du film sur l’art

Այս տարի, որոշվեց միջոցառումն անցկացնել առցանց։ Եվ լավ նորությունն այն է, որ ֆիլմերի մեծ մասը կարելի է դիտել անվճար։  14 տարի շարունակ կազմակերպվող այս միջոցառումն առաջին անգամն է, որ առցանց է առաջարկում դիտել իր ամբողջական ծրագիրը՝ 14 գեղեցկագույն ֆիլմեր արվեստի վերաբերյալ։

Միջոցառումը մեկնարկում է վաղը՝ հունվարի 22-ին և կտևի մինչև հունվարի 31-ը։ Սակայն, ֆիլմերի հղումները ակտիվ կմնան իրենց ցուցադրությունից հետո ևս տասն օրերի ընթացքում։ Ֆիլմերի անվճար տեղադրումը հնարավոր դարձավ Լուվրի թանգարանի և մի շարք պրոդյուսերների բանակցությունների արդյունքում՝ հաշվի առնելով այն փաստը, որ Ֆրանսիայում կինոթատրոնները և մյուս մշակութային հաստատությունները այսօրվա տվյալներով՝ առաջիկայում վերաբացման հեռանկար չունեն։

Եվ այսպես, հունվարի 22-ից Լուվրի կայքէջում անվճար կարելի է դիտել վավերագրական ֆիլմեր, լսել ռեժիսորների մասնակցությամբ կազմակերպված կոնֆերանսներ և քննարկումներ՝ Վելասկեսի, Պիկասոյի, Մատիսի, Վան Էյկ եղբայրների, Ժաումե Պլենզայի և շատ ուրիշ մեծ արվեստագետների մասին։

Ի դեպ, Ժաումե Պլենզայի աշխատանքներով երևանցիները կարող են հիանալ նաև ոչ առցանց, պարզապես զբոսնելով Կասկադի Գաֆէսճեան քանդակների պարտեզով։

Իսկ մեզ մնում է միայն հուսալ, որ վիրտուալ իրականությանը և համակարգչային էկրաններին փոխարինելու կգան մի ժամանակ այդքան սովորական թվացող կինոթատրոնային մութ դահլիճներն ու հարմարավետ բազկաթոռները։

Լիլիթ Սոխակյան

Փարիզ, 2021թ․


    Տասնամյա ճանապարհի վերելքներն ու վայրէջքները (մաս 2)

    Խորհրդածություններ հայկական մուլտիպլիկացիայի շուրջ Պատկերա-գունանկարչական լուծման պրոբլեմը ամենակարևորներից է մուլտարվեստի տեսության մեջ։ Պատկերման պայմանականությունն այդ արվեստի գլխավոր առանձնահատկությունն է։ Ելնելով...