«ՌեԱնիմանիա» անիմացիոն ֆիլմերի և պատկերապատման արվեստի միջազգային կինոփառատոնը՝ միանալով «Աննեսի» (ANNECY)  խոշորագույն միջազգային անիմացիոն կինոփառատոնի և  Saqanima Georgian Animators Association-ի  կազմակերպած 6-րդ  անիմացիոն ֆիլմերի նախագծերի զարգացման և փիչինգի աշխատարանին, բացառիկ հնարավորություն է ընձեռնում Հայաստանի անիմացիոն ֆիլմարտադրողներին ներկայացնել իրենց նախագիծը՝ անիմացիոն ֆիլմերի նախագծերի զարգացման և փիչինգի աշխատարանի շրջանակում։ Աշխատարանը կիրականացվի առցանց ձևաչափով։ Այս մասին հայտնում են «ՌեԱնիմանիա» անիմացիոն ֆիլմերի և պատկերապատման արվեստի միջազգային կինոփառատոնի մամուլի ծառայությունից։ 

Անիմացիոն ֆիլմարտադրողները կներկայացնեն «ՌեԱնիմանիա»-ի դատին իրենց նախագծերը, և ուսումնասիրության արդյունքում «Աննեսի» փառատոնի փորձագետների կողմից կընտրվի 6 անիմացիոն կինոնախագիծ։ «Աննեսի» փառատոնի կողմից ընտրված պրոդյուսերը կժամանի Վրաստան և սեպտեմբերի 28-ից հոկտեմբերի 2-ը կվարի 5-օրյա թրեյնինգ ֆիլմարտադրողների համար։

Դասընթացները կվերաբերեն նախագծերի սցենարական, արտադրական աշխատանքներին, մարքեթինգին, բյուջեի կազմմանը և այլ մասնագիտական գիտելիքների ձեռք բերմանը:  Աշխատարանի արդյունքում ընտրված 1 լավագույն նախագիծը «Աննեսի»-ի փորձագետների կողմից կընտրվի մասնակցելու «Աննեսի» փառատոնի կինոշուկային, որը տեղի կունենա 2021 թվականի հունիսին։ «Աննեսի» փառատոնի կողմից լավագույն նախագծի հեղինակը կստանա անվճար հավատարմագրման հնարավորություն, իսկ «ՌեԱնիմանիա»-ն կփորձի գտնել աջակիցներ, որպեսզի հաղթող մասնակիցը կարողանա մեկնել «Աննեսի»:

Անհրաժեշտ փաստաթղթերի մասին տեղեկատվությունը ներկայացված է «ՌեԱնիմանիա» փառատոնի պաշտոնական կայքում։ Ծրագրին մասնակցելու վերջնաժամկետը սեպտեմբերի 14-ն է։
Ծրագրին կարող են դիմել տարբեր ձևաչափերի (կարճամետրաժ/լայնամետրաժ) անիմացիոն ֆիլմերի նախագծեր: Յուրաքանչյուր հեղինակ կարող է ներկայացնել միայն 1 նախագիծ: Ներկայացվող նախագիծը չպետք է լինի ուսումնական ծրագրի մաս կամ չի կարող նախապես գնված լինել հեռուստատեսության կողմից:

Հայտերը հնարավոր է ուղարկել  applications@reanimania.com էլեկտրոնային հասցեով:
Սա «ՌեԱնիմանիա» անիմացիոն ֆիլմերի և պատկերապատման արվեստի միջազգային կինոփառատոնի և «Աննեսի» (ANNECY)  խոշորագույն միջազգային անիմացիոն կինոփառատոնի առաջին նմանատիպ համագործակցությունը չէ։ 2018 թվականին Աննեսին և «ՌեԱնիմանիան»  Հայաստանում իրականացրել են Animation du Monde ծրագիրը:  Փառատոնի շրջանակներում Հայաստան ժամանեցին Աննեսիի փորձագետները՝  5-օրյա վարպետաց դասընթացներ անցկացնելու 10 լավագույն նախագծերի և իրենց հեղինակների հետ: