Օրեր առաջ ուշադրությունս գրավեց Ֆեյսբուքում տեղադրված մի տեսահոլովակ, ավելի ճիշտ՝ վերջինիս վերնագիրը՝ «Մի գնացեք Հայաստան»։ Մտածելով, որ դա մեր  «սիրառատ» հարևանների հերթական ձեռքի աշխատանքն է, նույիսկ չբացեցի ուղարկված հղումը ։ Օրերն անցնում էին, և երբ իմ Ֆեյսբուքյան էջում նրա ներկայությունը դարձավ մշտական, իսկ դիտումների քանակը հասավ 169 հազարի, ես չդիմացա գայթակղությանը։

Հուզիչ, գեղեցիկ և այնքան ճշմարիտ այս ֆիլմը ներկայացնում է Հայաստանն իր ողջ հմայքով։ Հեղինակը Ֆրանսիայում հայտնի բլոգեր, ռեժիսոր և լուսանկարիչ Բենյամին Մարտինին է, այստեղ ավելի հայտնի Tolt անվանումով։  Երիտասարդ արվեստագետը ճանապարհորդում է աշխարհի հետաքրքիր անկյուններ և նկարահանում «Մի գնացեք այնտեղ» հակասական վերնագրերով ֆիլմեր։

«Հավանաբար իմ նկարահանած լավագույն տեսանյութերից է»,- գրում է հեղինակը Հայաստանի մասին ֆիլմի առցանց ցուցադրության ավարտին։ Գունառատ բնություն, հարուստ պատմություն, եզակի մշակույթ, անմահական խոհանոց, ազնիվ և ջերմ բնակիչներ, բացառիկ ապահով երկիր, կարելի է վստահաբար ասել՝ Tolt-ը հիանալի ժամանակ է անցկացրել Հայաստանում։

Իհարկե, ֆիլմի Յութուբյան հղման տակ  շարունակում են գրվել հազարավոր մեկնաբանություններ, ծավալվում են քննարկումներ։   Հայերը շնորհակալ են հեղինակին, թուրքերը վարանում են, բազմաթիվ արտասահմանցիներ կիսվում են իրենց տպավորություններով․ քննարկվում է նույնիսկ Ղարաբաղյան հարցը, ծածանվում հայկական դրոշը և իհարկե լսվում Շառլ Ազնավուրի ձայնը։

«Լսել Շառլ Ազնավուր՝ լինելով Հայաստանում՝ անգին է», – խոստովանում է Toltը տեսանյութի սկզբում։ «Մի ողջ կյանք է հարկավոր այցելելու Հայաստանի բոլոր եկեղեցիներն ու վանքերը։ Մի գնացեք Հայաստան քանզի անսահման բան կունենաք պատմելու ընկերներին», -ամփոփում է ռեժիսորը։

Եվ թեպետ ֆրանսիացի մեր ընկերը քաղցր սուջուխը անվանում է տեղական «սնիկերս», և իհարկե սխալվում, քանզի սուջուխին համարժեքը չկա, մենք դա կանտեսենք և կներենք, քանզի ևս մեկ արտերկրացի գնահատեց և սիրեց Հայաստանը։

Լիլիթ Սոխակյան

Փարիզ